Сайнаас агууд…
Сайнаас Агууд дэвшихүй
/тойм/
Дандаа хуурай ширүүн факт ярьж хүмүүсийг яаж зоригжуулах юм бэ? гэж асууж болох юм. Харин “Гэрэлт ирээдүй –хамгийн сайн зоригжуулалт” гэж үздэг ч энэ нь хариулт болж чадахгүй. Ирээдүйг төсөөлөх нь утгагүйдээ биш хүмүүсийг зоригжуулах гэж оролдох нь дэмий цаг үрсэн хэрэг учраас. Та САЙНААС АГУУД ДЭВШИХҮЙ гэдэг үгний утгыг ойлгосноороо хүмүүсийг зоригжуулах гэж цаг хүчээ үрэх шаардлага байхгүй болно. Та хүчтэй баг бүрдүүлж чадвал, түүнээс хангалттай мотиваци, урам зориг урган гарах юм. Нөгөө талаар хүмүүсийн урмыг хугалах хамгийн найдвартай арга бол бодит байдлын тулгаралтанд удаж төдөлгүй нуран унах хоосон найдвар төрүүлэх явдал юм. Удирдагч хүн ирээдүйг харах , төсөөлөх, үнэнийг сонсдог, бодит байдлын өөдөөс эгц харж чаддаг, тийм нөхцлийг бүрдүүлж чаддаг байх хэрэгтэй. Мөн үгээ хэлэх боломжтой байх, үгээ сонсгох боломжтой байх хоёрын хооронд асар их зөрөө бий. Агуу компанийн удирдагч нар энэ ялгааг сайн ойлгодог бөгөөд тиймээс ч хүмүүс болоод үнэн сонсогдож чадаж байх тийм соёл , хэв маягийг бий болгохыг чухалчилдаг байна.
Америкийн 1500 шахам нэр цуутай компаний санхүүгийн тоо баримтыг цуглуулж, зэрэгцүүлэн шинжилж, ангилж цэгцлэн, тэдгээр тоо баримтын цаадах амьд, энгийн үнэнийг олж тогтоохын төлөө шургуу ажилласан Жим Коллинз болон түүний багийн 5 жилийн хөдөлмөр, уйгагүй хайгуулын үр дүнд энэ ном бүтжээ.
Уг ном үндсэн 9 бүлэгтэй бөгөөд бүлэг тус бүртээ бодит жишээ, судалгаа шинжилгээ, тодорхойлолт, дэлгэрэнгүй дүгнэлт зэргийг багтааж чаджээ.Өөрөөр хэлбэл маш хатуу сонгон шалгаруулалт хийх замаар Жим Коллинз болон түүний судалгааны баг, гайхамшигт үр дүнд хүргэсэн үсрэлт хийж энэ аижилтаа дор хаяж 15 жилийн турш хадгалсан элит компаниудыг тодорхойлж чадсан байна.
Олон уншигчийг, менежментийн стратеги, практикийн бараг бүх салбарт гэгээ тусгасан энэхүү судалгааны үр дүнгээс дурдахад:
Үндсэн дүгнэлтүүд
• Бүх агуу компаниуд амжилтанд хүрэх замаа хатуу ширүүн бодит үнэний өөдөөс нүүр тулж харахаас эхэлсэн.
• Оршин байгаа нөхцөл байдлаа чин үнэнээр ойлгохоос эхэлбэл, зөв шийдвэр ихэнхдээ ил тодорхой байдаг. Бодит үнэний хатуу ширүүн фактыг нүүр тулж харахгүйгээр зөв шийдвэр гаргана гэж байхгүй.
• Агуу үнэнд хүрэхийг эрмэлзэж байгаа компанид хамтран ажиллагсад нь өөрийн санаа бодлоо нээлттэй хэлж чадах орчныг бүрдүүлэх нь чухал зорилт ба эцэстээ, энэ нь компани үнэнийг нуудаггүй, үнэн сонсогдож байх орчныг бий болгоно гэсэн үг юм.
• Ийм уур амьсгалыг бий болгох үйл явц нь 4 гол зарчим дээр тулгуурлана.
1. Хариултыг биш, асуултыг удирдах
2. Маргаан бус, харилцан яриа мэтгэлцээнд дууд
3. Алдааг шүүн хэлэлц, тэгэхдээ бүү буруутга
4. Энгийн мэдээллийг, хэрэгсэхгүй өнгөрөхөд хэцүү мэдээлэл болгохын тулд “ улаан дарцаг”-ны аргыг хэрэглэ.
• Агуу компанид бусдаас бага хүндрэлтэй учирч байсан юм биш, харин тэд түүнд өөрөөр ханддаг. Тэд нөхцөл байдлыг эрүүл саруулаар үнэлдэг. үр дүнд нь тэд бэрхшээлийг давж, илүү хүчтэй болдог.
• Агуу үр дүнд хүрсэн компанийн удирдлагуудын сэтгэлзүй “ Стокдейлийн парадокс”-оор тодорхойлогдоно. Ялж чадна, ямар ч бэрхшээлийг даван туулж ялна гэдэгтээ хэзээ ч итгэл алдардаггүй, ҮҮНТЭЙ НЭГЭН ЗЭРЭГ ямар харгис хатуу байлаа ч үнэн бодит фактын өөдөө эгц хардаг.
• Харизм, хувь хүний хүчтэй чанар нь олон ололт ч, бас үүнтэйгээ нэгэн зэрэг дутагдал юм. Манлайлагчийн хүчтэй зан араншин удирдагдаж буй хүмүүс нь бодит үнэнийг нуудаг байдалд хүргэх талтай.
• Манлайлагчийн хувьд та алс хэтийн төсөөллөөс ажлаа эхлэх ёсгүй, харин хүмүүсийг бодит фактын өөдөөс эгц харж чаддаг байх, гарч болох үр дагаврыг үнэлж чаддаг байхад чиглүүлэх ёстой.
• Хүмүүсийн сайн ажлыг хангалттай үнэлэх урамшууллын тогтолцоог бий болгоно гэдэг цагийн гарз. Асуудал нь хүмүүсийн урам зоригийг сэргээхэд байгаа юм биш. Хэрвээ зөв хүмүүсийг сонгосон бол тэд урам зоригоор дутдаггүй. Анхаарах зүйл нь урам зоригийг унагаах хүчин зүйлсийг байлгахгүй байх. Хүмүүсийн урмыг хугалах хамгийн үнэн зам бол –бодит үнэн, фактыг үл тоомсорлох явдал юм.
Дондов